JOB 26 - Oshikwanyama Bible (OKYB)

1 Ndelenee Job okwa nyamukula ndele ta ti: 2 “Ove wa yambidida nawa ngahelipi oshingone, ndele wa kwafa ngahelipi okwooko kwaau ehe neenghono! 3 Ove wa pukulula ngahelipi ou ehe nounongo ndele wa holola ngahelipi eendunge dihapu! 4 Eendjovo doye we di lombwela lyelye, nomhepo yalyelye ya kala mwoove?

5 “Oilulu yokoshi tai kakama koshi yomeva noyoonakukalamo muo. 6 Oshovafi shi li hamunghele koshipala shaye, nonhele yenyonauno inai uvikwa. 7 Ota yale oumbalanhu kombada yedundakano, ndele ta endjelelifa edu ponhele pehe na sha. 8 Ota mange omeva kumwe noilemo yaye, noilemo itai pombauka koshi yao. 9 Ye ota uvike olukalwapangelo laye, ndele te li yale noshilemo shaye. 10 Nokwa finda omufindangonga momeva apa ouyelele nomulaulu tai shakenafana. 11 Eengudi deulu tadi kakama ndele tadi kala da kuminwa etangunino laye. 12 Okeenghono daye ta tukulukifa efuta ndele keendunge daye ta teyaula po Rahab. 13 Molwomufudo waye eulu tali yela. Eke laye la tyuula eyoka li nonhapo. 14 Taleni ei, oyo ominghulo adike deendjila daye, ndele fye ohatu udu ko tuu okunongofola kwaye! Olyelye hano ta dulu okushiiva okungunguma kweenghono daye?”