JOB 41 - Oshikwanyama Bible (OKYB)

Oinhimbu yongadu neenghono dayo

1 “Oto dulu tuu okuyula ongadu Leviatan nondjolo? Nelaka layo to dulu tuu okumangifa ngeno ongodi? 2 To dulu oku i xwekela mo meyulu layo ongodi ya taafinwa? Nolupanda layo oto li tyuulifa oshitenda sheengona? 3 Otai ku ilikana tuu, i neendjovo dihapu, ile tai ku popifa neendjovo dombili? 4 Yo otai ningi tuu ehangano naave, nokutya ove u i kufe i kale omupika woye? 5 Oto dulu tuu okudanauka nayo ngaashi to danauka nokadila, ile oku i manga, ovamwoye oukadona ve i kwate? 6 Oonakuhangenafana veeshi otave i landifa tuu, ndele tave i tukululile ovashingifi? 7 Oshipa shayo, oto dulu tuu oku shi twa eengona nomutwe wayo u u twe nekupa? 8 Tula nee eke loye kuyo. Diladila olwoodi. Ito ke shi ninga vali.

9 “Tala, eteelelo keshe tali ningi longaho muyo, nokuli moku i tala omunhu ta wile poshi. 10 Kaku nomuladi te i shindi. Olyelye ou hano ta dulu okukala koshipala shange? 11 Olyelye a pa nge sha tete ndi mu futile ngeno? Aishe oyo i li koshi yeulu alishe oyange.

12 “Ame inandi hala okumwenenena oinhimbu yayo ile eenghono dayo ile okushitwa kwayo kwa wapala. 13 Oshikutu shayo shokombada olyelye te shi i alulile? Olyelye ta dulu okuya momayoo ayo omikweyo mbali? 14 Olyelye a yeulula oivelo yomoshipala shayo? Ehaluko la dingilila omayoo ayo. 15 Ombuda yayo oipakotolwa i nomifinda, ya kwatakanifwa mo oshihoteka sha pama. 16 Oipakotolwa i li naanaa kumwe, omhepo itai dulu okupitila mo nande. 17 Oshikwao sha kwatifwa nashikwao, ya pama. Ya kwatafana, kai na apa tai kwatukunuka. 18 Okutwonghisha kwayo taku vemifa ouyelele, nomesho ayo e li ngaashi eefeleisho deluwa. 19 Mokanya kayo tamu di omalaka omundilo, tamu tuka mo eehandje. 20 Momayulu ayo tamu di omwifi, ngaashi mombiya tai fuluka ya ehelifwa oihati. 21 Omufudo wayo tau xwameke omakala, nelaka lomundilo tau di mokanya kayo. 22 Mofingo yayo omu neenghono, ehalukotilifo tali nhuka komesho yayo. 23 Eenhumba domolutu layo da pamenena shili, da fa da telekwa monhelekelo, itadi linyenge nande. 24 Omutima wayo wa kukuta ngaashi emanya, heeno, ngaashi emanya lokoshi yoshini. 25 Yo ngeenge tai litumbu po, ovaladi tava kakama, noumbada tau va dundakanifa. 26 Ngeenge tai kondjifwa neongamukonda, lihe noshilonga, nosho yo eonga, ile oshihengo, 27 oshivela tai shi tale oihati, oshikushu ngaashi oiti ya ola. 28 Oshikuti itashi i twala onhapo. Omakupulomanya e li ngaashi olungu kuyo. 29 Eedibo te di tale ngaashi oshihati, ndele tai yolo edungadungo lomaonga. 30 Ombinga yayo yokoshi oipakotolwa i nomayoo, monhata otai liendifile mo nokufiya mo omufinda ngaashi woshilei shokuxwa. 31 Oule womeva tai u fulukifa ngaashi ombiya. Etale tai li ningi ngaashi ombiya muyo omuvavo tau telekwa. 32 Ondjila yayo tai yela konima yayo, oule womeva u nomakufikufi a feenghwakutoka. 33 Kombada yedu pehe na nande sha she i fa, sha shitwa shihe noumbada. 34 Otai dini oinima aishe ya fimana. Oyo ohamba yoifitukuti aishe i nounhwa.”