1 Akutu, ongahelipi Omwene mehandu laye okwa tuvika noilemo omona okakadona kaSion! Efimano laIsrael meulu okwe li ekelashi poshi, ndele ina dimbulukwa oshipundi sheemhadi daye mefiku lehandu laye. 2 Omwene okwa hanauna nokuhenonghenda eenhele adishe dokukala kwaJakob, moupyuhandu waye Ye okwa hanauna po eehotengulu domona okakadona kaJuda nokwe di ngumaunina poshi; okwa xutula ouhamba neehamba dao. 3 Mehanyo lehandu laye okwa teta po keshe oluvinga laIsrael. Eke laye lokolulyo okwe li alula moipafi yomutondadi. NomuJakob okwa lungwinifa ngaashi elaka lomundilo tali lafa po ashishe keembinga adishe. 4 Okwa shila outa waye ngaashi omutondadi. Okwa kala ofika eke laye la yeluka ngaashi omunaita, ndele okwa dipaa po keshe eshi sha li sha wapalela omesho ometwali lomona okakadona kaSion. Oupyuhandu waye okwe u tila ngaashi omundilo. 5 Omwene okwe lininga ngaashi omutondadi, Ye okwa pona po Israel; eengulu doupuna adishe okwe di pona po, eehotengulu okwe di ngumauna po. Ndele okwa hapupalifa okulila nokukema kwomona okakadona kaJuda. 6 Ndele etwali laye okwe li hanauna po ngaashi oshikunino. Onhele yaye mwene yoshivilo okwe i hanauna po. Omwene okwa dimbwifila muSion oshivilo nEshabata, ndele mehandu laye la xwama okwa ta mo ohamba nomupristeli. 7 Omwene okwa ekelashi oaltari yaye notembeli yaye e i dinifa. Ye okwa yandja momake ovatondadi omakuma eengulu doupuna. Ovo va kalukila pombada motembeli yOmwene nokukuwilila ngaashi mefiku loshivilo. 8 Omwene osho a pangela a ngumaune po omakuma omona okakadona kaSion. Ye okwa shila ko oshiyelekifongodi, ndele Ye ina alula eke laye kehanauno. Heeno, eehote nomakuma okwe a nyikifa oluhodi, vo aveshe kumwe ova teyauka. 9 Oivelo yasho ya ningina medu, omakumba asho Ye e a tatula po nokwa teyaula po. Ohamba yasho novakulunhu vasho ve li mokati kovapaani. Kape nomalombwelo vali, novaxunganeki vasho ihava tambula vali omamoniko kOmwene. 10 Ovakulunhu vomona okakadona kaSion va kala omutumba poshi, va mwena. Komitwe davo ove lifundila ondwi yedu, vo ova djala eeshako. Oukadona vomuJerusalem ova nyongameka omitwe davo pedu. 11 Omesho ange a twiyala komahodi; eshi shomeni lange osha fuluka. Omutima wange wa hala okutopa omolwenyonauko lomona okakadona koshiwana shange. Osheshi ounona nouhanana tava pundile po meendabo doshilando. 12 Ohava ti kooina: “Oilya nomaviinyu oku li peni?” Eshi tava pundile meendabo doshilando ongaashi eendjashe, eshi eemwenyo davo tadi fudile momakolo ooina. 13 Oundobwedi ulipi ame ndi ku etele ndele handi dulu oku ku faafanifa nashike, oove Jerusalem? Ohandi ke ku faafanifa nashike, ame ndi dule oku ku hekeleka, oove okakadona, omona waSion? Osheshi enyonauko loye olinene li fike pefuta, kape na ou ta dulu oku ku velula? 14 Ovaxunganeki voye ve ku monena oinima yoipupulu noyoulai. Vo inave ku hololela owii woye, opo okukala kwoye ku lunduluke, ndelenee vo ove ku monena omaxunganeko oipupulu nomapukifo. 15 Aveshe ava hava ende nondjila, ohava pandula nomake molwoye, tava shiki omwilwa, ndele tava pukapuka komitwe molwomona okakadona Jerusalem: “Oshilando osho tuu osho ve shi tile: sha wanenena mewapalo, osho ehafo ledu alishe?” 16 Ovatondi voye aveshe otave ku ekamene omakanya avo. Vo otava sheke nokukweshela omayoo ndele tava ti: “Ofye otwe shi pona po, heeno, olo efiku twe li teelela. Fye otwe li hanga, twe li mona nee.”
17 Omwene okwa shakenifa eshi Ye e shi nuninine. Ondjovo yaye okwe i wanifa, ei Ye e i tongele pomafiku onalenale; okwe shi ngumauna po ke nonghenda, nomutondadi okwe mu hafifa molwoye, nokwa yelulila pombada oluvinga lomunaita naave. 18 Ifana pombada kOmwene, ove ohotekuma yomona okakadona kaSion! Tondokifa omahodi oye ngaashi omulonga omutenya noufiku. Ino dimbwa, u tulumukwe; eisho loye inali fifikina. 19 Penduka po! Ingida moufiku omefimbo lenangelo longuloshi. Tilashi omwenyo woye ngaashi omeva okoshipala shOmwene. Yelula kuye omake oye omolweemwenyo dounona voye, ovo tava file ondjala pomashakeneno omapandavanda aeshe. 20 Tala, Omwene, Ove u diladile olyelye ou we shi ningila ngaha! Ovalikadi ovo mbela ve nokulya oshiimati shomadimo avo nokutya, ouhanana ava hava humbatelwa momake? Ovapristeli novaxunganeki mbela ve nokudipaelwa motembeli yOmwene? 21 Pedu momapandavanda opa nangala ovanyasha novakulunhu. Oukadona vange novamati vange va wila po keongamukonda. Ove we va dipaa mefiku loye lehandu; wa twa uhe nonghenda. 22 Ovatilifi vange we va shivila nge keembinga adishe ngaashi efiku loshivilo. Nefiku olo lehandu lOmwene kapa li nande umwe a ya onhapo, ile e lixupifa. Ava nde va tekula nonde va kulifa, omutondadi wange okwe va mana po.
© Oshikwanyama Bible Revised © Bible Society of Namibia, 2008, 2012.
