OMAIMBILOKEMO 3 - Oshikwanyama Bible (OKYB)

1 Aame omulumenhu ou nda monifwa oluhepo koshikumbwati shoupyuhandu waye. 2 Oye okwa endifa nge ndele a twala nge momilaulu muhe nouyelele. 3 Heeno, efimbo alishe ta pilulile nge eke laye, heeno, efiku alishe. 4 Onhumba yange noshipa shange, Ye okwe i kunya, nomakipa ange Ye a teyaula po. 5 Oye okwa tungila nge omafitiko, a dingililifa nge noudiyo noudjuu. 6 Oye okwa kaleka omutumba monhele yomilaulu ngaashi oonakufya ava vonalenale. 7 Oye okwa idilila nge nekumangubu, osho ame itandi dulu okudja mo. Nokwa tula nge momalyenge madjuu oshikushu. 8 Nande handi ingida nonande handi ifana, Ye ita udu eindilo lange. 9 Eendjila dange okwe di fitikifa omakumamanya a hongwa, a ngolyola omalila ange. 10 Oye oku li oshilyani eshi sha nangela nge, onghoshi moshihondameno. 11 Oye okwa kandula po eendjila dange nokwa pombaula nge nokwa tokeka nge. 12 Oye a shila outa waye, nokwa ninga nge etanga loikuti yaye. 13 Oikuti yomonywa yaye e i yasha meefiyo dange. 14 Ame onda ninga oshiyolifa koshiwana shange ashishe, eimbilosheko omutenya aushe. 15 Oye okwa kutifa nge noinima ilula nokwa nwefa nge edimba. 16 Ndele Oye okwa kokotifa nge oumanya ndele a teya po omayoo ange, Ye okwa delaula nge momute. 17 Ndele oove omwenyo wange, owe u nyeka ombili, ame onda dimbwa ouwa. 18 Heeno, ame onda tile: “Etumbalo lange ola fiya nge po, nelineekelo lange kOmwene.”

19 Diladila oluhepo lange nokukalakala kwange, nedimba noudiyo. 20 Ngeenge omwenyo wange tau diladila oshinima eshi, otau nyongama mwaame. 21 Eshi handi shi tula momutima wange, onghee ndi nelineekelo: 22 molwouwanghenda wOmwene fye inatu kombwa po sheke, osheshi omafilonghenda aye kaena apa taa xulu po; 23 oo mape ongula keshe. Oudiinini woye ounene. 24 Omwenyo wange tau ti: “Omwene Oye oshitukulwa shange, onghee ame ohandi ka tula muye elineekelo lange.” 25 Omwene ota ningile ouwa kwaava tava tula muye elineekelo lavo nokomwenyo ou tau mu kongo. 26 Osho oshiwa okulineekela ekwafo lOmwene melimweneneno. 27 Osho osha wapalela omulumenhu a humbate ondjoko mounyasha waye. 28 Ne likalele omutumba ndele na mwene, eshi Oye e i mu lekifa. 29 Oye na twike okanya kaye mondwi, shiimba ope neteelelo. 30 Oye na yandje olupandu kwaau te mu denge, oye na kale a wana omasheko. 31 Osheshi Omwene ita ekeleshi fiyo alushe. 32 Ndelenee Ye ngeenge a nyikifa oluhodi, Oye ta filonghenda yo molwounene womauwanghenda aye. 33 Osheshi hakomutima Ye ta fininike nokunyikifa oluhodi ovana vovanhu.

34 Eshi eenghwate adishe domoshilongo tadi lyatelwa koshi yeemhadi, 35 eshi vo hava endameke ouyuki womulumenhu koshipala shaau wOkombadambada, 36 eshi vo hava lundulula eendjovo doihokolola yomunhu, mbela Omwene ke di wete? 37 Olyelye ota popi ndele tashi ningwa, Omwene ngeenge ine shi popya? 38 Owii nouwa itau di mo mokanya kaau wOkombadambada? 39 Oshike omunhu ta keme mokukala kwaye. Keshe umwe na keme molwoulunde waye. 40 Natu lipulaapuleni eendjila detu noku di hadahada, fye tu lialuke kOmwene. 41 Natu yeluleni omitima pamwe nomake kuKalunga komeulu, tu tye: 42 “Ofye otwa tauluka ndele twa kala tu noita. Ove ino tu dimina po. 43 Ove owe li tuvikila nehandu ndele we tu taataa. Ove wa dipaa uhe nonghenda. 44 Ove mwene we li tuvikila noshilemo, opo eindilo nande limwe itali dulu okupitila mo. 45 Ove we tu ninga oshala nomafikofikinini mokati koiwana. 46 Ovatondi vetu aveshe ove tu ekamekela omakanya avo. 47 Oshitukulwa shetu ehalwifwa nombwili nehanauko nenyonauno. 48 Omakungulukilo omeva taa kunguluka momesho ange, molwenyonauko lomona okakadona koshiwana shange. 49 Eisho lange tali kunguluka lihe nefudepo, ndele itali dimbuka, 50 fiyo Omwene meulu ta kevauka ndele ta taalele poshi. 51 Eisho lange tali etele nge ouyehame molwoukadona aveshe vomoshilando shange.

52 “Venya ovo va ninga ovatondadi vange ngaho, ohava taataa nge ngaashi odila. 53 Omwenyo wange vo ove u idilila mondungu, ndele ova kupula nge nomamanya. 54 Omeva okwa tondoka kombada yomutwe wange, ame nda tya: ‘Nda xula po!’ 55 Moule wondungu ame onda ifana edina loye, Omwene. 56 Ove wa uda ondaka yange: ‘Onghuwo yange ove ino i fitikila okutwi kwoye.’ 57 Ove wa ehena popepi mefiku olo ame nde ku ifana, ndele wa tile: ‘Ino kala wa tila!’ 58 Oove Omwene, wa popila nge mokuhokololifa kwange. Wa mangulula omwenyo wange. 59 Oove Omwene, u wete omafininiko ange, ame handi hepekwa nao. Yukifile nge! 60 Ove wa mona ko onghonehalo lavo, omadiladilo avo aeshe oo e nondubo naame. 61 Omwene, omashekondjovo avo Ove we a uda, omadiladilo avo aeshe oo e nondubo naame. 62 Omilungu davo nomauko avo ovatondi vange ohava kondjifa nge efiku alishe. 63 Vo ngeenge ve li omutumba ile tava penduka po, tala, aame eimbilosheko lavo. 64 Omwene, va alulila shi fike poilonga yomake avo. 65 Kukutika eemwenyo davo, etulomutima loye nali va hange. 66 Va shikulifa ehandu loye, Ove u va fe mo okoshi yeulu lOmwene.”