Ovanongo vokoushilo
1 Ndele Jesus eshi a dalelwa muBetlehem shomuJudea omounyuni wohamba Herodes, tala, ovanongo vokoushilo ve uya kuJerusalem, 2 ndele tava ti: “Ohamba yOvajuda, ya dalwa paife, oi li peni? Osheshi onyofi yayo otwe i mona koushilo, notwe uya okulinyongamena kuyo.” 3 Ndele ohamba Herodes eshi ye shi uda, oya haluka nOvajerusalem aveshe pamwe nayo. 4 Ndele ye okwa ongela ovapristeli ovakulunhu aveshe novanongo vomishangwa vomoshilongo ashishe, nokwe va pula shili, Kristus apa ta dalelwa. 5 Ndele ove mu lombwela tava ti: “OmuBetlehem shomuJudea; ngaashi pa shangwa ngaha komuxunganeki:
6 ‘Naave yo Betlehem medu laJuda,
haave munininini mokati kovapangeli vomuJuda,
osheshi mwoove tamu di Omwene
ou ta lifa oshiwana shange shaIsrael.’ ”
7 Opo nee Herodes a ifana ovanongo meholeko, ndele te va pula shili pefimbo lilipipo onyofi ya holoka. 8 Ndele ye ote va tumu kuBetlehem ndele ta ti: “Indeni ko hano, nye mu ka konge shili okaana; ndele ngeenge mwe ka mona, lombweleni nge, naame yo ndi uye ndi linyongamene kuko.” 9 Ndele vo eshi va uda ohamba, ova ya, ndele tala, onyofi inya va mwene koushilo, oye va kwatela komesho fiyo ya fika kombada yeumbo olo mwa kala okaana, noya kanghama. 10 Ndele eshi va mona onyofi, ova hafa unene neenghono. 11 Ndele ova ya meumbo ndele tava mono mo okaana naina yako, Maria. Ndele tava tu eengolo nove ke linyongamena, va tuula omamona avo, ndele tave ka pe oshali: oshingoldo noidimba iwa nomirha.Ova tuula omamona avo, ndele tave ka pe oshali: oshingoldo noidimba iwa nomirha.
12 Ndele eshi va kunghililwa kuKalunga mondjodi, vaha shune vali kuHerodes, ova ya hano nondjila imwe kedu lavo.
Ekukumo kuEgipiti
13 Ndele eshi va ya, tala, omweengeli wOmwene okwa holokela Josef mondjodi ndele ta ti: “Fikama, kufa okaana naina u ye onhapo kuEgipiti, u kale kwinya fiyo ohandi ku lombwele; osheshi Herodes e li po ta diladila okukonga okaana e ka dipae.”
14 Ye okwa fikama, a kufa okaana naina oufiku, ndele ta i kuEgipiti. 15 Nokwa kala ko fiyo okefyo laHerodes. Opo nee di ninge doshili odo Omwene e di tongifa omuxunganeki ou ta ti: “OmuEgipiti nda ifana mo omona wange.”
Okudipawa kwounona
16 Opo nee Herodes eshi a mona ovanongo ve mu henuka, okwa handuka a handukilila, ta tumu kuBetlehem nokomikunda dasho adishe, ndele ta dipaifa ounona aveshe ava ve nomido mbali naava vehe di kwete, ngaashi a yeleka omafiku enya e a pula kovanongo. 17 Osho ngaha pa wanifwe ondjovo yomuxunganeki Jeremia, ou ta ti: 18 “Eweelelo tali udika muRama, ekwenauko linene neenghali. Rakel ta lilile ounona vaye, ye ina hala okuhekelekwa osheshi kave po vali.”
Jesus ta di kuEgipiti
19 Ndele Herodes eshi a fya, tala, omweengeli wOmwene okwa holokela Josef mondjodi muEgipiti 20 ndele ta ti: “Fikama, kufa okaana naina, u ye kedu laIsrael, osheshi venya va kongele omwenyo wokaana, ova fya.” 21 Ndele ye okwa fikama, a kufa okaana naina, ndele ta i kedu laIsrael.
22 Ndelenee eshi a uda Arkelaus a nangala Judea ponhele yaxe Herodes, okwa tila okuya ko. Okwa ya koshilongo shaGalilea, ngaashi a kunghililwa kuKalunga mondjodi. 23 Ndele eshi e uya ko, okwa kala moshilando edina lasho Nasaret. Opo nee eshi sha tongwa kovaxunganeki shi wanifwe: “Oye ta ka ifanwa Omunasareti.”
© Oshikwanyama Bible Revised © Bible Society of Namibia, 2008, 2012.
