OMAYELETUMBULO 26 - Oshikwanyama Bible (OKYB)

1 Ngaashi eandu pokwenye nodula pefimbo leteyo nosho yo efimano itali wapalele elai. 2 Ngaashi namusheshe ta papala nongaashi okahanameva taka tuka po nosho yo etulomutima longaho itali wanifwa. 3 Oshokoto konghambe noitomo kondongi noshimwati kombuda yomalai. 4 Elai ino li nyamukula paulai walo, uha faafane nalo. 5 Elai li nyamukula paulai walo, lo lihe litale linongo. 6 Ou ta tumu ondaka nelai, ota tete po eemhadi daye, ndele ta nu omupya. 7 Ngaashi omaulu oshingudu taa endjelele nosho yo eyeletumbulo mokanya kelai. 8 Ou ta mange okamanya moshiumbifo ongaau ta fimaneke elai. 9 Ngaashi ekiya tali tu meke longholwe, osho eyeletumbulo mokanya kelai. 10 Ngaashi omuumbi wouta ta umbu aveshe, osho e li ou ta tambula elai e li fute, nosho yo ou ta tambula ovaendaendi ndele te va futu. 11 Ngaashi ombwa tai alukile onghungo yayo, osho elai tali popyulula oulai walo. 12 Wa mona ko tuu omulumenhu te litale ye omunongo momesho aye mwene? Okuteelela eendunge delai ku dule winya. 13 Omundede ta ti: “Onghoshi i li mondjila. Onghoshi onyasha i li poluhaela.” 14 Ngaashi omuvelo tau linyenge komakandula ao, osho yo omundede mombete yaye. 15 Omundede eshi a velela neke laye metiti, a loloka unene, ita dulu oku li alula ko kokanya kaye. 16 Omundede ye omunongo momesho aye mwene, e dule vaheyali ava hava nyamukula neendunge. 17 Ou ta kwata ombwa tai ende po komatwi, e li ngaashi ou ta handuka molweemhata dovanhu. 18 Ngaashi omupwidi ta umbu oikuti ya xwama omundilo, oikutu yefyo, 19 omulumenhu osho e li ou ta kengelele mukwao ndele ta ti: “Ame nda danauka ashike!” 20 Ngeenge kape noikuni, omundilo tau dimi po, nongeenge pehe nomulundili, eemhata tadi xulu po. 21 Ngaashi ekala lokuxwameka likwao noshikuni shomundilo nosho yo omulumenhu weemhata ta xwameke ehandu. 22 Eendjovo domulundili di li ngaashi ouleke ndele tadi fenungutile moukololo vomenielela lomutima. 23 Omilungu nomutima womunaipupulu ou li ngaashi oshikangwa sha xuwa oshisiliveli. 24 Omutondadi te lidimbwifa nomilungu daye, ndelenee meni laye ta diladila omakengelelo. 25 Ondaka yaye ngeenge te i shitukifa ondaka yohole, ino mu lineekela, osheshi oixuna iheyali i li momutima waye. 26 Outondwe nande tau liholeke mokukengelela, owii wao tau hololwa moshiongalele sheongalo. 27 Ou ta fe elambo, oye mwene ta wile mo. Naau ta alangatifile ko emanya, okombada yaye lo tali alukile. 28 Elaka loipupulu tali tondo oonakuyehamekwa kulo, nokanya ke noumbudi taka nyonauna po.