Okuhoololwa kwaIsrael itaku lundululwa
1 Ame ohandi pula hano: Kalunga okwa ekelashi mbela oshiwana shaye? Nandenande. Osheshi naame yo Omuisraeli womoludalo laAbraham, womapata aBenjamin. 2 Kalunga ina ekelashi oshiwana shaye e shi shiiva nale. Ile kamu shi shii eshi omushangwa tau ti mokuhepaulula Elia, nhumbi ta popi Israel kuKalunga ta ti: 3 “Omwene, ovaxunganeki voye ove va dipaa, ndele va kumauna po eealtari doye, aame andike nda xupa po, notava nangele omwenyo wange.” 4 Ndelenee enyamukulo laKalunga otali mu lombwele shike? “Ame onde lixupifila ovalumenhu omayovi aheyali ava inava twa eengolo koshipala shaBaal.” 5 Osho ngaha nomefimbo lopaife yo oku na oshixupe pahoololo lefilonghenda. 6 Ehoololo okefilonghenda, hakoilonga; ngee okoilonga yomunhu, nena efilonghenda laKalunga kali fi vali efilonghenda.
7 Ongahelipi hano? Eshi Israel he shi lalakanene, ine shi hanga, ndelenee ovahoololwa ve shi hanga: vakwao va kukuta, 8 ngaashi pa shangwa:
“Kalunga okwe va pa omhepo yeemhofi,
omesho aha mone ko nomatwi aha ude ko
fiyo onena eli.”
9 NaDavid ota ti:
“Oshililo shavo nashi va ningile elulo noshiliva
nepundukifo nonghone,
10 omesho avo naa twike, vaha mone ko;
ndele ove petameka natango eembuda davo.”
11 Ame handi ti hano: Ovajuda ova pundukile? Ahowe, itashi dulika. Ndele eshi va nyona, exupifo ole uya kovapaani, opo Ovajuda ve va twile ondubo. 12 Ndelenee epunduko lavo ngeenge oupuna wounyuni, nokuninipikwa kwavo oupuna wovapaani, ouyadi wavo otau eta oupuna u fike peni!
13 Ohandi popi kunye ovapaani (Ovakriste vomovapaani), ngaashi aame omuyapostoli kovapaani, handi fimaneke oshilonga shange, 14 ndi ladipike, ngeenge tashi dulika, oludi lange, nondi xupife nande vamwe vomuvo. 15 Osheshi okweekelwashi kwavo ngeenge kwa ninga ekwatakanifo lounyuni, okutambulwa kwavo oshike nee, ngeenge kaku fi okunyumuka movafi? 16 Ndele ngeenge omungome wotete omuyapuki nosho yo olumbololo lomungome alishe oliyapuki, nomudi ngeenge omuyapuki, noitai yo oiyapuki.
17 Ndele ngeenge oitai imwe oya tetwa ko, naave, ove olumono lomofuka, wa twikwa mokati koitai, ou wa pewa oshitukulwa shoye komidi nokomeva olumono liwa, 18 ino linenepeka nokudina oitai; ngeenge oto linenepeke, kala u shi shii, haave wa humbata efina, efina olo le ku kwatelela. 19 Ove to ti mbela: “Oitai ei oya tetwa ko, opo ame ndi twikwe ko.” 20 Eewa hano, vo ova tetwa ko kokuhaitavela kwavo, ndele ove owa kwatelwa ko keitavelo loye. Ino linenepeka, kala wa tila, 21 osheshi Kalunga ngeenge ina xupifa oitai yopashitwe, naave yo ite ku xupifa. 22 Tala hano ouwa nouladihandu waKalunga, ouladihandu waye kwaava ve mu efa, ndele ouwa waKalunga kwoove, ngee to kala mouwa waye; ngee hasho, naave yo oto kewa ko. 23 Navo yo, ngeenge itava anyene mokuhaitavela kwavo, otava ka twikwa mo, osheshi Kalunga e neenghono oku va twikulula mo. 24 Osheshi ove ngee wa kewa mo molumono lomofuka, nowa twikwa molumono liwa la tekulwa, lihe fi lomoludi loye, hano unene tuu oitai ei yopashitwe otai ka twikwa molumono lavo vene.
25 Osheshi ovamwatate, opo muha ye neendunge deni vene, onda hala ndi mu hololele oshiholekwa eshi: Elikukutiko ola hanga Israel kombinga, fiyo ouyadi wovapaani we uya mo. 26 Ndele Israel ashishe otashi ka xupifwa, ngaashi pa shangwa:
“Omumangululi ota ka dja muSion,
ndele ta ka kandula mo odinokalunga muJakob;
27 ndele ehangano lange navo olo eli,
eshi handi kufa po omatimba avo.”
28 Pavaengeli, ovo ovanaita molweni, ndelenee pahoololo, ovo ovaholike omolwootate. 29 Osheshi eeshalinghenda neifano laye Kalunga ihe li lundulula. 30 Osheshi ngaashi nye nale mwa li inamu dulika kuKalunga, ndele paife omwa mona efilonghenda omolwokuhadulika kwavo, 31 osho tuu naava va kala ihava dulika paife, opo molwefilonghenda eli mwe li pewa, ovo yo va mone efilonghenda paife. 32 Osheshi Kalunga okwa idilila aveshe mokuhadulika, opo e va file onghenda aveshe.
Eendunge daKalunga da fimana
33 Oule u fike peni woupuna noweendunge nowounongo waKalunga? Omatokolo aye ohaa konakonwa kulyelye, neendjila daye olyelye e di shii?
34 “Osheshi olyelye a shiiva omayele Omwene?
Ile olyelye a kala omupukululi waye?
35 Ile olyelye e mu pa sha tete,
ye e shi mu futile?”
36 Osheshi aishe oyomuye nomolwaye ndele tai shuna kuye. Oye na fimanekwe alushelushe. Amen.
© Oshikwanyama Bible Revised © Bible Society of Namibia, 2008, 2012.
