RUT 3 - Oshikwanyama Bible (OKYB)

Rut ta nangala keemhadi daBoas

1 Opo nee inamweno Naomi ta ti kuye: “Omumwange, ame ohandi ke ku kongela onhele yetulumuko, opo u kale u li nawa. 2 Boas, ou povapiya vaye ovakainhu wa kala, oye omukwetu. Tala, oufiku wonena ye ota xu oilya moshipale. 3 Hano likosha u vave nokulidika u ye koshipale. Ndelenee ino lihololela omulumenhu ou, fimbo ye ina lya noina nwa. 4 Ye eshi ta ka nangala, tala apa ta ka nangala, ndele to i ko, ove u uvukulule ekumbafa keemhadi daye, u nangale po. Ye ote ku lombwele, osho u noku shi ninga.” 5 Ndele ye okwe mu nyamukula ta ti: “Ashishe osho to shi lombwele nge, ame ohandi ke shi ninga.” 6 Opo nee ye a ya koshipale ndele ta ningi naanaa ngaashi a lombwelwa kuinamweno. 7 Boas eshi a mana okulya nokunwa nomutima waye wa hafa okwa ya, a ka nangale ponduba yoilya. Ndele Rut okwe uya ta hondjaunine, ndele ta uvukulula ekumbafa keemhadi daye ndele ta nangala mo. 8 Ndelenee mokati koufiku omulumenhu okwa haluka ndele ta piluka, nokwa mona omukainhu a nangala keemhadi daye. 9 Ndele ye okwa pula: “Oove lyelye?” Ye ta nyamukula: “Aame Rut, omupiya woye omukainhu. Uvikile nge, omupiya woye, omavava oye, osheshi oove omufyuululi wepya letu.” 10 Ndele ye ta ti: Omumwange, Omwene ne ku nangeke noupuna. Ohole yoye yopaife, we i holola, oi dule inya yotete, eshi ino shikula ovamati eehepele ile oipuna. 11 Hano paife omumwange, ino tila, ohandi ka yukifa eendjovo doye. Oshilando ashishe shovakwetu oshi ku shii, oove omukainhu wa fimana. 12 Hano osho shili, aame omufyuululi wepya, ndelenee ope nomukwetu umwe omukwetulela omufyuululi wepya, e li nge komesho. 13 Kala apa oufiku wonena. Ye ngeenge te ku fyuulula mongula, heeno, ye ne shi yukife, ndele ye ngeenge ina hala oku ku fyuulula, ame ohandi ku fyuulula, oshili, ngaashi Omwene e nomwenyo. Kala apa u nangale fiyo ongula. 14 Nosho ngaha a nangala keemhadi daye fiyo ongula ndele okwa fikama ongula inene kulaula, fimbo ovanhu va nyengwa okudimbulukwafana. Osheshi Boas okwa tile: “Paha shiivike omukainhu a ile koshipale.” 15 Opo nee ye ta ti: “Oshikutu shoye shokombada shi eta apa, u shi kwate.” Rut okwe shi kwata, ndele winya okwa tapela mo eekilograma omilongo mbali yoilya nokwe i mu twika; ndele a ya moshilando. 16 Ndele eshi a ya kuinamweno, ye okwe mu pula: “Omumwange, oinima yoye oi li ngahelipi hano?” Ndele ye e mu hepaululila ashishe osho omulumenhu e mu ningila. 17 Ndele ta ti: “Oilya ei yoimbale ihamano oyo a pa nge, osheshi okwa lombwela nge: ‘Itashi dulika u ye hamakasha kunyokomweno.’ ” 18 Opo nee Naomi ta ti: “Omumwange, kala ashike wa mwena fiyo wa shiiva eendjovo doye da yukifwa ngahelipi. Osheshi omulumenhu ou ita tulumukwa nena fimbo ina yukifa oshinima osho shoye.”